07SERIKALI imetia saini makubaliano ya mkopo wa fedha kiasi cha sh. trilioni 2.697 kutoka Benki ya Dunia kupitia Shirika la Maendeleo la Kimataifa (IDA), ili kutekelezaji miradi mitano ya bara na Zanzibar, ukiwemo wa ujenzi wa barabara na ujumuishaji wa fursa za uchumi.
Akizungumza katika hafla hiyo jijini Dar es Salaam leo Agosti 19, 2021 Waziri wa Fedha na Mipango Dk. Mwigulu Nchemba, amesema fedha za mkopo huo zitafanikisha utekelezaji wa miradi mitano muhimu kwa huduma za jamii.
Ameitaja miradi hiyo kuwa ni ujenzi wa barabara na ujumuishaji wa fursa za uchumi (RISE) wenye thamani ya sh. bilioni 693.2 na mradi wa kuboresha elimu ya juu kwa mabadiliko ya uchumi (HEET) thamani yake ni sh. bilioni 982.1.
Mingine ni mradi wa Tanzania ya kidigitali (DTP), wenye thamani ya sh. bilioni 346.6, mradi wa mabadiliko ya sekta ya nishati Zanzibar (ZESTA) thamani yake ni sh. bilioni 328.1 na mradi wa kukuza ukuaji jumuishi Zanzibar: Maendeleo Jumuishi (BIG-Z) wenye thamani ya sh. bilioni 346.6.
Dk. Nchemba ameeleza kuwa miradi hiyo itawezesha utekelezaji wa mpango wa maendeleo wa Tanzania ambao unataka kujenga uchumi shindani wa viwanda kwa malengo ya wananchi.
Amesema utekelezaji huo ni kupitia uboreshaji wa miundombinu, upatikanaji wa nishati wa kuaminika, kuimarisha mazingira ya biashara na uwekezaji na kuimarisha mifumo ya elimu za mafunzo.
Amebainisha kuwa mkopo huo ni ishara kwamba serikali ya Tanzania inaaminiwa, hivyo watasimamia fedha hizo kuhakikisha zinatekelezwa katika shughuli lengwa.
Ameeleza kuwa mikataba hiyo iliyosainiwa inaongeza thamani ya miradi iliyofadhiliwa na Benki ya Dunia kufikia Dola za Marekani 5,502.4 na kwamba hivi sasa serikali inakamilisha awamu nyingine ya miradi ya kipaumbele.
WAZIRI UJENZI
Kwa upande wake Waziri wa Ujenzi na Uchukuzi, Dk. Leonard Chamuriho, amesema RISE ni miradi ya barabara jumuishi inayohusisha fursa za huduma za jamii.
“Tunafurahi kuona Benki ya Dunia inatukopesha fedha nyingi kwa mradi huu utakaotekelezwa kwa kipindi cha mwaka 2021 hadi 2026,” ameeleza Dk. Chamuriho.
Amefafanua mradi wa RISE utaboresha barabara za vijijini na kutoa fursa za ajira kwa watu katika maeneo yanayopitiwa na miradi yaani Wilaya sita katika Mikoa minne ambayo ni Geita, Tanga, Lindi na Iringa.
“Hii inamaanisha kuwa karibu asilimia 58 ya watu ndani ya kilometa tano katika maeneo ya vijiji vilivyochaguliwa wanaweza kutumia barabara nzuri,” amesema.
Ameongeza mradi huo utajenga uwezo katika usimamizi endelevu wa barabara zinazoboreshwa, ukijumuisha ushirikishwaji wa jamii na utoaji wa fursa za ajira 35,000.
“Tunashukuru mradi huu utashirikisha wananchi wakiwemo wanawake ambapo nilitembelewa na kikundi chao hivi karibuni, sasa hii ni fursa kwao kwakuwa wametengewa asilimia 20 kuonyesha uwezo wao,” amesema.
Amesema kwa upande wa barabara za Mikoa ambazo ndiyo hasa zinahusika na Wizara yake, zitakuwa kilometa 135 na vipaumbele vilivyotumika kuchagua miradi hiyo vimetoka katika Mpango wa Maendeleo ya Kilimo awamu ya pili.
“Tumechagua miradi katika Mikoa inayotoa mazao mengi na Wilaya ambazo zina uzalishaji mkubwa katika shughuli za kilimo, hivyo tunamshukuru Rais Samia Suluhu Hassan, kwa kutuletea mradi huu nasi tunamuahidi tutasimamia kwa ukamilifu ili thamani ya fedha ionekane,” amesisitiza.
Mkataba wa RISE ulitiwa saini na Mtendaji Mkuu wa Wakala wa Barabara Tanzania (TANROADS), Rogatus Hussein, Mtendaji Mkuu Wakala wa Barabara Mijini na Vijijini (TARURA), Mhandisi Victor Seff na Mkurugenzi wa Benki ya Dunia nchini, Mara Marwick.
Mradi huo ni muendelezo wa utekelezaji wa miradi ya barabara ambayo TANROADS imefanya hadi sasa katika Mikoa mbalimbali nchini.
NA JUMA ISSIHAKA
