KATIBU wa Halmashauri Kuu ya Taifa (NEC) ya CCM, Itikadi na Uenezi, Shaka Hamdu Shaka, ametoa mwezi mmoja kwa Mamlaka ya Maji Zanzibar (ZAWA), kuhakikisha wananchi wanapata majisafi na salama kupitia mradi wa tanki la Kikwajuni ambalo limekamilika, lakini halijaanza kutoa huduma.
Ameonya kutofanya kazi kwa ufanisi miradi iliyotumia fedha za wananchi kutekelezwa ikiwamo kufanyika kwa upembuzi yakinifu kabla ya kuanza kwa utekelezaji, ni kumhujumu Rais wa Zanzibar na Mwenyekiti wa Baraza la Mapindu, Dk. Hussein Ali Mwinyi na kuichonganisha serikali na wananchi, jambo ambalo Chama hakitaruhusu litokee.
Shaka aliyasema hayo akiwa katika ziara ya kukagua utekelezaji wa Ilani ya Uchaguzi ya CCM 2020-2025 katika jimbo la Kikwajuni Mkoa wa Mjini Unguja, ikiwa ni sehemu ya ziara ya Sekretarieti ya Halmashauri Kuu ya Taifa, Visiwani Zanzibar.
“Kifungu cha 186 cha Ilani ya Uchaguzi ya CCM 2020-2025, kinaonyesha jinsi Rais Mwinyi atakavyopeleka maji kwa wananchi.
“Kwa namna yoyote, kutotimia kwa miradi ya maendeleo ni kumhujumu Rais. Nakupeni mwezi mmoja, maji yatoke hapa,” aliagiza Shaka kwa ukali baada ya kutoridhishwa na maelezo ya wataalamu wanaosimamia mradi huo.
Alieleza kuwa, CCM inazo taarifa za ziada juu ya kutofanya kazi kwa mradi huo uliotarajiwa kuleta ahueni kubwa ya huduma ya maji safi kwa wananchi, huku akisema taarifa hizo, zinaonyesha kuna mikono ya baadhi ya watu wasiotaka ufanye kazi kwa maslahi yao.
Shaka alisema Serikali ya Mapinduzi Zanzibar ya Awamu ya Nane, chini ya Rais Dk. Mwinyi, inafanya kazi kubwa kuleta maendeleo, hivyo CCM haitakubali kuona jitihada hizo zikiwekewa vizingiti na baadhi ya watu na hatimaye zishindwe kuleta nafuu ya maisha kwa wananchi.
“Kumkwamisha Rais Mwinyi ni kuwakwamisha wananchi. Haiwezekani mradi huu, tangu mwaka 2018 hadi leo usitoe maji. Viongozi wakubwa wamekuja katika mradi huu, CCM haitakubali kuona ukiendelea kutotoa huduma, wahusika jipangeni ndani ya mwezi mmoja maji yatoke hapa, nasi tutaufuatilia kwa karibu kuona maagizo haya yanafanyiwa kazi kwa kiasi gani,” alisema.
Kauli ya Shaka ilikuja baada ya Mbunge wa Kikwajuni ambaye pia ni Waziri wa Mambo ya Ndani ya Nchi, Hamad Yusuph Masauni, kukiomba Chama kisaidie kusukuma mradi huo ili utoe maji baada ya juhudi zao kugonga mwamba kwa muda mrefu.
Masauni alisema kuwa, mradi huo umetekelezwa na fedha nyingi ambazo yeye binafsi na viongozi wenzake, walihangaika kuzitafuta kwa wafadhili, lakini licha ya tanki kujengwa na miundombinu mingine kukamilika haujaanza kutoa maji kama ilivyotarajiwa.
Akitoa maelezo kuhusu mradi huo, Mkurugenzi Mkuu wa ZAWA, Dk. Salha Mohamed Kassim, alikiri mradi kutoafanya kazi kwa muda mrefu, ingawa umekamilika na kwamba, hilo linatokana na chanzo kilichotarajiwa kujaza maji katika tanki hilo kutokuwa na uwezo kwa sasa wa kutosheleza ujazaji maji.
Hata hivyo, alisema kuna mikakati ya dharura ya kuhakikisha tanki hilo linajazwa maji kwa ajili ya kupeleka huduma kwa wananchi wakati jitihada za kupata maji ya kutosha kulijaza kama ilivyokusudiwa zikiendelea kufanyika.
Katika ziara hiyo, Shaka pia alitembelea Kituo cha Afya Rahaleo ambako alikagua maboresho mbalimbali yaliyofanywa na serikali katika huduma za afya kituoni hapo ukiwemo ukarabati wa majengo na kufunga vifaa vya kisasa kisha kuzungumza na watumishi wa kituo hicho.
Alitembelea na kushiriki kikao katika Shina Namba 4, Tawi la CCM Kikwajuni Juu ambako aliwakumbusha vijana nafasi yao katika ulinzi wa Chama na kushiriki shughuli za maendeleo, huku akisema Chama kinatambua kilio chao kuhusu ajira.
Na MWANDISHI WETU, Zanzibar
