WAZIRI Mkuu Kassim Majaliwa ametoa wiki mbili kwa Bohari ya Dawa (MSD) ihakikishe kuanzia leo hadi Februari 5, 2022 iwe imeshafikisha vifaa vyote vinavyohitajika katika vituo vya kutolea huduma za afya mkoani Manyara kwa kuwa tayari fedha zimeshalipwa.
“Mheshimiwa Rais Samia Suluhu Hassan ameshatoa maagizo kuwa vituo vyote vya afya vinapokamilika vianze kutoa huduma, hivyo MSD lazima ihakikishe inafikisha vifaa katika vituo hivyo haraka. Majengo ya kutolea huduma yameshakamilika tunataka tuone yakitumika na yasipotumika yataharibika.”
Waziri Mkuu alitoa agizo hilo, alipokagua mradi ya ujenzi wa Kituo cha Afya cha Mogitu kilichopo wilayani Hanang’, akiwa katika ziara ya kikazi ya kukagua miradi ya maendeleo inayotekelezwa na Serikali mkoani Manyara
Amesema serikali imedhamiria kuboresha huduma za afya nchini, hivyo kukamilika kwa kituo hicho cha afya cha Mogitu kunalenga kusogeza huduma za afya kwa wananchi na kuwapunguzia kutembea umbali mrefu wa kufuata huduma hizo katika Kituo cha Afya cha Kata ya Katesh.
Pia, Waziri Mkuu amemuagiza Mganga Mkuu wa Wilaya ya Hanang Dk. Boniface Manditi, ahakikishe kituo hicho kinaanza kutoa huduma za afya kwa wananchi kwa kuwa tayari ujenzi wake umekamilika.
Naye, Mganga Mkuu wa Wilaya ya Hanang’ Dk. Manditi alisema gharama za utekelezaji wa mradi huo ni sh. milioni 578,926,000, ambapo kati yake sh. milioni 400 zimetolewa na Serikali Kuu, sh. milioni 125,726,000 zimetolewa na Halmashauri ya Hanang’ na mchango wa wananchi ni sh. milioni 53,200,000. Dkt. Manditi alimuhakikishia Waziri Mkuu kuwa kuanzia leo huduma zitaanza kutolewa kituoni hapo.
Alisema kituo hicho kinatarajiwa kuhudumia jumla ya wakazi 11,725 kutoka katika vijiji vitatu vya Kata ya Mogitu, ambavyo ni Mogitu, Gabadaw, Gidagamowd na wakazi wa maeneo ya jirani. Alisema mradi huo uko katika hatua za ukamilishaji ukiwemo ukamilishaji wa mifumo ya maji safi na maji taka.
Wakati huo huo, Waziri Mkuu Majaliwa amerejea kauli ya Rais Samia Suluhu Hassan aliyoitoa juzi wakati akizindua tamasha la utamaduni wa Kilimanjaro ya kuwataka wananchi wakakikishe wanatunza chakula walichonacho na watumie mvua zilizoanza kunyesha kwa kupanda mazao ya muda mfupi.
Waziri Mkuu alisema kwa kuwa msimu wa mvua umechelewa wananchi watumie mvua zilizoanza kunyesha kwa kupanda mazao ya muda mfupi. “Tujitahidi kuhifadhi chakula tulichokuwa nacho na tujiepushe na shughuli za kijamii zinazotumia chakula kingi ili tuwe na akiba ya chakula ya kutosha na wanaouza chakula wauze kwa utaratibu mzuri.”
Kadhalika, Majaliwa aliweka jiwe la msingi la ujenzi wa mradi wa maji wa Mogitu-Katesh uliogharimu sh. bilioni 2.4. Mradi huo unatarajiwa kuzalisha lita milioni 2.5 kwa siku huku mahitaji ya wakazi wa maeneo hayo ni lita milioni 2.4 kwa siku.
Alisema utekelezaji wa miradi ya maji nchini ni mkakati maalumu wa Rais Samia wa kumtua mama ndoo kichwani, ambao aliuanza tangu akiwa Makamu wa Rais, hivyo amewata viongozi wanaotekeleza miradi hiyo wahakikishe malengo yanafikiwa na wananchi wanapata maji safi na salama.
Na MWANDISHI WETU, KIGOMA
