Na Mwandishi Wetu, GEITA
Baraza la Taifa la Hifadhi na Usimamizi wa Mazingira(NEMC), limewataka wachimbaji wadogo wa madini nchini kuzingatia matumizi sahihi ya zebaki ili kulinda afya zao na kuhifadhi mazingira kutokana na kubaini kuwapo kwa ongezeko la matumizi hayo.
Mkurugenzi wa Tathmini ya Athari ya Mazingira na Jamii kutoka NEMC, Lilian Mkambuz akizungumza kwa niaba ya Mkurugenzi Mkuu wa NEMC, aliyasema hayo jana mjini hapa alipokuwa akifungua mafunzo ya uhifadhi wa mazingira katika maonyesho ya matumizi sahihi ya teknolojia ya KAIKA kuinua wachimbaji kuchumi na hifadhi ya mazingira kwa wachimbaji wadogo mkoani Geita.
Alisema mafunzo hayo yamekuja wakati mwafaka kutokana na ongezeko la wachimbaji linalokwenda sambamba na uharibifu wa mazingira na matumizi ya kemikali za zebaki.
“Hali hii inasababisha athari katika afya ya jamii na uharibifu wa mifumo ya ikolojia iwapo tahadhari hazitachukuliwa katika upangaji na utekelezaji wa matumizi endelevu ya zebaki. Kwa hiyo tunapaswa kuchukua tahadhari kabla ya athari kutokea,”alisema.
Aidha, alisema ili kukidhi matakwa ya Serikali katika kufanikisha azma ya kupunguza uchafuzi utakanao na mtumizi endelevu ya rasilimali za maji, uongo na afya za jamii lengo la kutafiti juu ya teknolojia mbadala zilizoko nchini na zile ambazo zinafanyiwa tafiti mbalimbali na kuzifanyia majaribio na hatimaye zitasambazwa kwa wachimbaji wadogo hapa nchini.
Pia alisema kuwapa elimu juu ya matumizi yake kwa lengo la kuwafanya waondokane na matumizi ya zebaki.
Naye, Msimamizi wa Mradi wa Kudhibiti matumizi ya Zebaki Tanzania, Dk.Befrina Igulu, alisema wameona umuhimu wa kutumia maonesho hayo kutoa elimu kwa wachimbaji hao kujua athari zake matumizi ya zebaki na namna ya kukabiliana nazo.
“Kupitia Mradi huu tutaweza kupitia Sheria na Kanuni zilizopo na kuziboresha kwa kuingiza vipengele vitakavyowezesha usimamizi thabiti wa uingizaji, utunzaji utumiaji na zebaki nchini pamoja na masuala ya utekelezaji,”alisema.
Alibainisha kupitia mradi huo elimu itatolewa kwa wananchi hususan wachimbaji wadogo kuhusu madhara ya zebaki na namna bora ya kuitumia bila kuathiri afya na mazingira.
Naye, Mchimbaji mdogo wa Dhahabu kutoka Geita, Alex Bawaziri, aliishukuru NEMC kwa mafunzo hayo na kuomba serikali iendelee kutafuta kubuni mbinu mbadala kwa ajili ya kudhibiti matumizi ya zebaki.
“Sisi tutaendelea kupunguza matumizi na kuchukua tahadhari katika utumiaji wa zebaki ili usilete madhara katika afya ya binadamu na mazingira,”alisema.
Mchimbaji kutoka Mwanza, Salome Kusekwa, alisema mafunzo hayo yamemsaidia kujua madhara ya zebaki na namna ya kujikinga.
“Tunamshukuru Rais kwa kutuwezesha mafunzo haya kupitia NEMC ,wanawake wachimbaji mimba zilikuwa zikiharibika na kupata shida kwenye uoni wa macho lakini baada ya mafunzo haya tumejua namna ya kutumia zebaki bila ya kuleta madhara kwenye mazingira na afya zetu,”alisema.
