SERIKALI imeupatia Mfuko wa Hifadhi ya Jamii kwa Watumishi wa Umma (PSSSF), sh.trilioni 2.17 ikiwa ni malipo ya awamu ya kwanza ya deni la wastaafu walioanza kazi kabla ya Julai, mwaka 1999, kupitia utaratibu wa hati fungani maalumu kwa ajili ya kuuwezesha mfuko huo kulipa mafao ya wastaafu kwa wakati na kuongeza mapato yake.
Kauli hiyo ilitolewa jijini Dodoma na Katibu Mkuu Wa Wizara ya Fedha, Emmanuel Tutuba, alipozungumza katika hafla ya utiaji saini makubaliano na PSSSF ya ulipaji wa kiasi hicho cha fedha ili kuuwezesha mfuko huo kuboresha utendaji wao wa kulipa mafao kwa wastaafu.
Makubaliano hayo yalifanyika kati ya Katibu Mkuu wa Wizara ya Fedha na Mipango na Mlipaji Mkuu wa Serikali,Tutuba na Mkurugenzi Mkuu wa PSSSF, Hosea Kashimba.
Akizungumza katika hafla hiyo, Tutuba alisema serikali imeamua kutoa dhamana hiyo baada ya deni hilo kusababisha hitilafu katika mizania ya rasilimali za mfuko huo ikilinganishwa na wajibu wa ulipaji mafao, kwa kuwa mfuko huo umekuwa ukifanya malipo kwa kuzingatia kipindi chote cha ajira ya mstaafu kikiwemo kipindi cha kabla ya Julai 1999 cha kuanzishwa kwa mfuko huo.
“PSSSF ilianzishwa kufuatia kuunganishwa kwa mifuko minne (4) ya Pensheni, ukiwemo mfuko wa PSPF ambao ulianzishwa mwaka 1999 na kuanza kulipa mafao mwaka 2004 kwa kuzingatia kipindi chote cha ajira ya mstaafu kikiwemo kipindi cha kabla ya Julai 1999, maana yake mstaafu wa mwaka 2004 aliyeajiriwa mwaka 1970, alilipwa na mfuko kipindi chote cha ajira yake”, alifafanua.
Alisema kulikuwa na makubaliano na serikali wakati wa uanzishaji wa Mfuko wa PSPF na kwa kuzingatia utaratibu wa kisheria kabla ya mwaka 1999.
Katibu Mkuu huyo alisema serikali imeona ni sahihi kufanya malipo hayo kwa nia njema ya kuhakikisha sekta hiyo muhimu inaendelea kuhudumia Watanzania na kushiriki vyema kwenye ujenzi wa uchumi.
AGIZO LA RAIS SAMIA
Tutuba alisema kukamilika kwa mpango huo ni utekelezaji wa agizo la Rais Samia Suluhu Hassan, la kuhakikisha ucheleweshwaji wa mafao ya wastaafu wa PSSSF, linafanyiwa kazi kwa haraka ili punde mtumishi anapostaafu apatiwe mafao yake na mwezi unaofuata aanze kupokea pesheni yake ya kila mwezi.
Alisema serikali ina matumaini makubwa kuwa, fedha hizo zilizotolewa zitasaidia katika kulipa mafao ya wanachama wanaostaafu kwa wakati, kuendelea kulipa pensheni za mwezi kwa wastaafu na kutumika katika uwekezaji wenye tija ambao utasaidia kukuza thamani ya mfuko.
Katibu Mkuu huyo aliutaka mfuko huo kuongeza ufanisi na kuhakikisha unawafikia wanachama wake wote nchini hususani wale waliopo vijijini na maeneo yasiyofikika kwa urahisi, ili wanufaike na huduma.
Tutuba alibainisha kwamba, PSSSF imekuwa na deni ililolirithi baada ya iliyokuwa mifuko ya hifadhi ya jamii kuvunjwa na kubaki na mfuko mmoja wa watumishi wa umma, hivyo serikali kuamua kulipa deni hilo.
“Kama wizara tumekuwa na majadiliano mara kadhaa na uliokuwa Mfuko wa Pensheni kwa Watumishi wa Umma (PSPF) na sasa PSSSF kuhusu kushughulikia suala la deni la ‘pre 1999’, baada ya kufanya uchambuzi wa kina wa suala hilo na kwa maslahi mapana ya wanachama wa mfuko.
“Serikali imeamua kulipa deni hilo kwa kuanzia na sh. trilioni 2.17 na litalipwa kwa utaratibu wa hati fungani maalumu ya kuanzia miaka minane hadi 25,”alisema Tutuba.
Alisema kutokana na makubaliano hayo, anaamini ufanisi na utendaji wa mfuko utaongezeka hususan katika kuwahudumia wanachama ambao wengi sasa wamestaafu.
Katibu Mkuu huyo alisema PSPF ilikuwa ikiomba serikali kuiongezea uwezo ili ilipe kiinua mgongo na pensheni za mwezi kwa watumishi wa umma ambao walikuwepo katika ajira kabla ya mwaka 1999.
Kwa mujibu wa Katibu Mkuu huyo, wizara inaamini fedha hizo zitasaidia kulipa mafao kwa wakati ya wanachama wao wanaostaafu, kuendelea kulipa kwa wakati pensheni za mwezi kwa wastaafu na pale zitakapotumika katika uwekezaji uwe wenye tija, ambao utasaidia kukuza thamani ya mfuko na kutimiza wajibu wao kwa muda mrefu ujao.
“Mpaka sasa serikali imeshailipa PSSSF sh. bilioni 500 kati ya sh. bilioni 724 za deni lililohakikiwa na inaendelea kulipa deni hili,lengo likiwa ni kuona mfuko huo na sekta ya hifadhi ya jamii kunakuwa na ustawi unaotakiwa na hatimaye kulinda maslahi ya wadau kwa muda mrefu ujao,”alisema.
Tutuba alisisitiza azma ya serikali chini ya Rais Samia ni kuona wastaafu ambao wamelitumikia taifa lao wanafurahia maisha yao ya kustaafu.
Alisema baada ya kutia saini makubaliano yao ni matarajio yao kuwa,malalamiko kutoka kwa wanachama hususan wastaafu yatapungua kwa kiasi kikubwa, kama siyo kumalizika kabisa, huku akiwataka kuendelea kujipanga vema na kwamba wizara ina imani na utendaji wao wa kazi.
Katibu huyo aliuagiza mfuko wa PSSSF kuendelea kuboresha huduma na kuwafikia wanachama waliopo vijijini ili nao wafurahie ustaafu wao popote walipo, badala ya kuwaacha waendelee kufunga safari mpaka makao makuu ya mkoa kwa kutafuta huduma za mfuko.
KASHIMBA
Kwa upande wake, Mkurugenzi Mkuu wa PSSSF, Kashimba aliishukuru serikali kwa kushughulikia suala la michango ambayo haikuwasilishwa kwa uliokuwa Mfuko wa PSPF kwa jina maarufu la “Pre 1999 liability”.
“Tunakuhakikishia kuwa kila kiasi tutakachopokea kitaelekezwa katika maeneo kusudiwa, yakiwemo ya uwekezaji ili kuongeza thamani na ukwasi wa mfuko, lakini pia jukumu kuu la ulipaji wa mafao kwa wakati kwa wanachama wetu wanaostahili kulipwa,” alisema.
Akizungumzia historia ya mfuko huo, Kashimba alisema PSSSF ilianzishwa kwa Sheria ya Mfuko wa Hifadhi ya Jamii kwa Watumishi wa Umma Na. 2 ya Mwaka 2018, kufuatia kuunganishwa kwa mifuko ya Pensheni wa LAPF, PPF, GEPF na PSPF ambapo, baada ya kuanzishwa kwake ulirithi mali na madeni yote ya mifuko iliyounganishwa.
Na Happiness Mtweve,Dodoma
