RAIS Samia Suluhu Hassan, ameelekeza kubadilishwa kwa majengo ya shule kutoka ya chini na sasa kuwa ya maghorofa ili kukabili changamoto ya baadhi ya kata kushindwa kutekeleza miradi hiyo kutokana na kuwa na maeneo yasiyotosha.
Aidha, amekemea vitendo vya baadhi ya wananchi wanaohujumu miundombinu kwa kuzibua vyoo wakati wa mvua, kutupa taka, hivyo kuziba mitaro ya maji na kumwaga mafuta barabarani, akisema vitendo hivyo vinaathiri umadhubuti wa miradi.
Rais Samia aliyasema hayo jijini Dar es Salaam jana, wakati wa ufunguzi wa Barabara mpya ya Bagamoyo kipande cha njia nne cha Morocco – Mwenge chenye urefu wa kilometa 4.3.
Alisema kutokana na sehemu nyingi kukumbwa na changamoto ya maeneo madogo na hivyo kushindwa kujenga shule, ni wakati sahihi wa kubadili aina ya ujenzi.
“Nilikwenda Mkuranga nikakuta changamoto hii, nimekuja Kinondoni kuna hili, nadhani ni wakati mwafaka sasa tubadilishe majengo ya shule zetu, badala ya mabanda kuongozana sasa twende juu,” alisema.
Alieleza kufanya hivyo kutaondoa changamoto hiyo, kwani ujenzi wa ghorofa halina ukomo zaidi ya uwezo wa kifedha.
Alisema kwa maeneo madogo yaliyopo ni vyema wakaona namna ya kujenga maghorofa kwa kuwa juu hakuna mipaka zaidi ya uwezo wa kitaalamu na fedha.
“Lakini, vinginevyo kuna mipaka tuliyowekewa na wenzetu wa mipango miji, kwa hiyo ndugu yangu Tarimba (Mbunge wa Kinondoni) kwa eneo dogo ulilonalo, tujipange kwenda juu badala ya kukaa kugombana na kuchelewesha maendeleo,” alisema.
Aidha, Rais Samia alikemea vitendo vya baadhi ya wananchi wanaotupa taka kuziba mitaro na hivyo kusababisha mafuriko, huku wengine wakizibua vyoo wakati wa mvua.
“Wanafanya hivi bila kujali watoto wetu ni watundu wakati mwingine hawasikii, wanaingia katika mitaro hiyo na kubeba maradhi,” alisema.
Alisema wengine huchimba michanga katika maeneo ya miradi na hivyo kupunguza umadhubuti wa miundombinu kama ilivyotarajiwa.
Rais Samia alisema wapo baadhi ya watu wanaoegesha gari pembeni na kuachia mafuta, jambo ambalo linaharibu barabara, hivyo kuigharimu serikali kukarabati kabla ya muda uliopangwa.
“Kuna tabia nyingi za ajabu ajabu zimekuwa zikifanyika, niwaombe sana ndugu zangu wa Dar es Salaam, twende tukatunze miundombinu tunayojenga, naombeni sana tubadilike,” alisema.
Aliwataka waipokee miradi, waitunze na kuitumia ipasavyo kwa kufuata sheria ili kupata manufaa yaliyokusudiwa katika ujenzi wa miundombinu hiyo.
Kuhusu mradi wa barabara hiyo, alisema wazo la utekelezaji wake lilianza wakati wa Hayati Dk. John Magufuli, hivyo ni vyema wananchi kuhakikisha wanabeba juhudi zake ili aliyoyatamani yaonekane.
Alieleza serikali inafanya jitihada nyingi katika kujenga miundombinu nchi nzima ili kuleta urahisi wa usafiri na usafirishaji wa watu na mizigo na kuinua uchumi.
Alisema upanuzi na maboresho hayo ya barabara si tu yatapunguza kero ya msongamano, bali yatapunguza ajali za barabarani wakati wa kutoka na kuingia katika Jiji la kibiashara la Dar es Salaam.
Alizitaka Wizara ya Ujenzi na Uchukuzi na Wakala wa Barabara Tanzania (TANROADS), kuhakikisha kazi za ujenzi wa barabara na madaraja zinatekelezwa kwa viwango vilivyokubaliwa kimkataba ili zidumu kwa muda uliokusudiwa.
Rais Samia alieleza kwamba, serikali itaendelea kuboresha Mfuko wa Barabara ili miundombinu yote iendelee kufanyiwa matengenezo ya uhakika na kwa wakati.
Alisema serikali itafanya kila juhudi za kupata fedha za kutosha kwa ajili ya matengenezo ya barabara zote nchini kupitia TANROADS na Wakala wa Barabara Mijini na Vijijini (TARURA).
“Nadhani mmeanza kuona TARURA tumeiongezea fedha, lengo ni kuhakikisha Tanzania inapunguza barabara za vumbi na kuwa na barabara zinazopitika misimu yote,” alisema.
Aidha, aliwataka wananchi kuendelea kuchukua tahadhari dhidi ya wimbi la nne la Ugonjwa wa Virusi vya Corona (Uviko-19) kwa kuchanja.
Kuhusu fedha sh. trilioni 1.3 mkopo kutoka Benki ya Dunia, alisema zinahitaji tathmini na ufuatiliaji na tayari serikali imeanza kuimarisha kitengo cha tathmini na ufuatiaji hivi karibuni watateua mtendaji atakayesimamia hilo.
Kwa upande wake, Waziri wa Ujenzi na Uchukuzi, Profesa Makame Mbarawa, alisema utekelezaji wa mradi huo ni mwendelezo wa mkakati wa serikali kupunguza msongamano wa magari kwa jiji la Dar es Salaam.
Alisema kero ya msongamano iliyokuwa sugu, serikali ilianzisha mpango wa kutatua kero hiyo ikiwa ni utekeleza wa Ilani ya CCM.
Alisema kukamilika kwa mradi huo, kutapunguza pia ajali za barabarani na kurahisisha usafiri katika Jiji hilo.
Alieleza fedha za utekelezaji wa mradi huo ni mkopo wa sh. bilioni 71.85 kutoka JICA, huku serikali ikichangia kwa kutoa msamaha wa kodi mbalimbali, uhamishaji miundombinu na kulipa fidia ambapo thamani yake ni sh. bilioni 8.2.
Alisema juhudi za serikali ni vyema zikaungwa mkono kwani ni chachu ya maendeleo kwa wananchi.
Alimhakikishia Rais Samia kwamba, wataitunza barabara hiyo na kuifanyia ukarabati kadri itakavyohitajika ili idumu kwa muda unaokusudiwa.
Katibu Mkuu wa Chama Cha Mapinduzi (CCM), Daniel Chongolo, alisema mradi huo ulianza na kuwekewa Jiwe la Msingi akiwa miongoni mwa watendaji wa wilaya hiyo.
Alisema miundombinu ya wilaya hiyo, imeboreshwa kwa kiwango kikubwa na muda mfupi, kadhalika kwa gharama kubwa.
Alisema barabara hiyo itaunganisha njia nne kutokea Posta hadi Tegeta, hivyo kuondoa changamoto za msongamano wa magari.
“Ujenzi wa miundombinu hii, inaonyesha dhamira ya dhati ya utekelezaji wa ahadi zilizotolewa katika Ilani ua Uchaguzi ya CCM,” alisema.
Alisema mifereji iliyojengwa katika barabara hizo, itaondoa changamoto ya mafuriko kwa wakazi hasa wa Mtaa wa Bwawani ambao mara nyingi walilazimika kuhama kutoka kwao kwenda maeneo salama.
Akitoa taarifa ya mradi huo, Mtendaji Mkuu wa TANROADS, Mhandisi Rogatus Mativila, alisema mradi huo umehusisha upanuzi wa kilometa 4.3 za barabara kutoka Morocco hadi Mwenge.
Pia, alielez umehusisha uwekaji wa taa za kuongozea magari, mifereji ya kupitisha maji na njia za waenda kwa miguu.
Alisema ujenzi wa mradi huo, umetekelezwa na muungano wa Kampuni ya NIPPO Corporation na DAI NIPPON Construction huku Mshauri ni kampuni ya INGEROSEC Corporation zote za Japan.
Kwa mujibu wa Mhandisi Mativila, mradi huo ulianza kutekelezwa Aprili 18 mwaka 2019 na umekamilika Agosti 31 mwaka huu.
Aliongeza kati ya wafanyakazi walioajiriwa 550 katika mradi huo, Watanzania ni asilimia 98, hivyo umezalisha ajira kwa wananchi.
Mhandisi Mativila alisema ujenzi huo ni awamu ya pili baada ya ile ya kwanza kukamilika iliyokuwa na kilomita 12.7 mwaka 2015, hivyo awamu zote zinafikisha kilometa 17.
Naye, Mwakilishi Mkazi wa JICA, Yamamura Naofumi, alisema shirika hilo limekua likifanya kazi na Tanzania hasa katika miradi ya miundombinu.
Alitaja mradi wa kwanza kushirikiana ni ujenzi wa Daraja la Selander miaka ya 1980 na miradi mingine ya miundombinu nchini likiwemo Daraja la Juu la Mfugale.
Alisema upanuzi wa barabara hiyo, utapunguza msongamano wa magari na kurahisisha usafirishaji kutoka kilomita tatu kwa saa hadi kilometa 40 kwa saa.
Aliongeza kukamilika kwa barabara hiyo kutaongeza usafirishaji wa mizigo kwenda katika Bandari ya Dar es Salaam.
Aliishauri serikali ya Tanzania, kuharakisha utoaji wa vibali vya kazi kwa Wataalamu kutoka Japan ili kuharakisha utekelezaji ya miradi.
Mkuu wa Mkoa wa Dar es Salaam, Amos Makalla, alimpongeza Rais Samia kwa hatua ya kuidhinisha fedha kwa ajili ya utekelezaji wa miradi mikubwa mitatu Wilaya ya Kinondoni.
Aliitaja miradi hiyo ni Uwanja wa Mpira wa kisasa utakaogharimu sh. bilioni nne, Kituo cha Mabasi cha kisasa Mwenge na Ujenzi wa Jengo kubwa la Utawala.
Aliahidi kuanza utekelezaji wa miradi hiyo mara tu baada ya sherehe za maadhimisho ya miaka 60 ya uhuru wa Tanzania.
Hata hivyo, alisema Rais Samia ameidhinisha fedha sh. bilioni 165 kwa ajili ya ujenzi wa mradi wa maji Kawe, utakaosaidia Goba, Mabwepande, Bunju na maeneo mengine.
Na JUMA ISSIHAKA
