WANANCHI wa Kata ya Idete Jimbo la Mlimba, mkoani Morogoro wamemshukuru Mbunge wa Jimbo hilo, Godwin Kunambi kwa kukabidhi kiasi cha shilingi 220,000 kwa uongozi wa Zahanati ya kata hiyo kwa ajili ya kufanikisha uungwaji wa Bomba la Maji mserereko.
Kwa muda mrefu Zahanati hiyo imekua haina maji ya mserereko jambo ambalo lilikua linawalazimu wagonjwa wanaoenda kupata huduma hasa akina Mama wajawazito kulazimika kutumia bomba la kumpampu jambo ambalo kwao siyo rafiki.
Akizungumza baada ya kukabidhiwa kiasi hicho cha fedha na Mbunge Kunambi, Afisa Muuguzi wa Zahanati hiyo, Juliana Marko, amemshukuru Mbunge huyo kwa msaada wake huo ambapo amesema utawasaidia akina Mama wajawazito ambao wamekua wakienda kujifungulia kwenye Zahanati hiyo.
“Tumekua na changamoto hii ya Maji kwa mrefu ambapo imekua ikitulazimu sisi na wagonjwa wetu kutumia bomba la kupampu lakini kwa kiasi hiki cha fedha ambacho kimetolewa na Mbunge wetu Kunambi tuna uhakika Sasa wa kuwa na bomba la maji mserereko ambalo litakua msaada kwetu, tunatumia nafasi hii kumshukuru sana,” amesema Juliana.
Kwa upande wake Mbunge Kunambi akikabidhi mchango huo wa kufanikisha uungwaji wa Maji kwenye zahanati hiyo amesema lengo lake ni kuona anapunguza changamoto ya Afya kwenye kata hiyo ambapo tayari pia ameshafanikiwa kupatikana kwa Afisa Tabibu ambaye amesharipoti huku pia akiahidi kumalizia jengo la Mama na Mtoto ndani ya kipindi cha miezi sita.
“Nimefika hapa kukagua ujenzi wa jengo hili la Mama na Mtoto lakini nikaambiwa kuwa hapa hakuna Maji Mserereko haiwezekani Zahanati ikose bomba la maji, natoa kiasi cha fedha kinachotakiwa na nikuagize Mhandisi wa Maji wa Wilaya kuhakikisha ndani ya siku mbili hizi Bomba linafika na maji yanatoka hapa.
Sera ya Serikali ni kuona kila Kata inakua na Kituo Cha Afya, Sisi Jimbo letu lina Kata 16 lakini mpaka sasa tuna Vituo vinne vya Afya tunataka ndani ya miaka mitano hii tuwe na vituo takribani 10, hivyo nikuagize Diwani wa hapa Idete uhakikishe eneo linapatikana ili na sisi hapa tuanze ujenzi wa Kituo chetu cha Afya,” amesema Kunambi.
Katika hatua nyingine Mbunge huyo ametembelea Kata ya Mofu ambayo imekua ikikabiliwa na changamoto ya umeme ambapo amejionea nguzo za umeme zikiwa zimeshafika kwenye kata hiyo.
Wakati huo huo Kunambi alimpgia simu Meneja wa Tanesco Wilaya ya Kilombero ambaye amemuahidi hadi kufikia Desemba Mwaka huu kata hiyo itakua inawaka umeme.
“Niwaombe Tanesco ni kweli nguzo zimeshafika lakini tunahitaji mtuongezee nguzo zingine kwa ajili ya kupeleka umeme kwenye maeneo ya huduma za Jamii ikiwemo Shule ya Sekondari na Zahanati yetu ya Mofu lakini pia kwenye kaya maskini,” amesema Kunambi.
Na Mwandishi wetu
