NAIBU Waziri wa Katiba na Sheria, Geophrey Mizengo Pinda, amevitaka vyuo vikuu nchini ambavyo vinatoa kozi ya mahakimu kuanza kubadili mfumo na kufundisha kwa lugha ya kiswahili ambayo wataitumia kazini baada ya kuhitimu, kwa kuwa tayari Sheria ya kuendesha mashauri ya mahakama kwa lugha ya kiswahili imeshapitishwa.
Geophrey ametoa kauli hiyo wakati Akifungua mkutano wa wadau Kuhusu masuala ya msaada wa kisheria na upatikanaji wa haki kwa wananchi iliyoandaliwa na wizara ya Katiba na sheria jijini Arusha.
Amesema Sheria ya matumizi ya lugha hiyo ya kiswahili katika kuendesha mashauri imeshapitishwa hivyo mahakimu wahakikishe wanaitumia kikamilifu bila woga kwa lengo la kutoa haki kwa wananchi wakati wa kuendesha mashauri.
Amesema suala la lugha limekuwa kikwazo kikubwa katika uendeshaji wa mashauri ambapo Wananchi wengi wamekuwa hawaelewi lugha hiyo hivyo kujikuta wakishindwa kupata haki stahiki.
Amesema kwa sasa kuna haja ya vyuo vikuu nchini kubadili mfumo na kuanza kutumia lugha ya kiswahili kama lugha ya kufundishia kwa kuwa ndiyo lugha watakayokwenda kuitumia kazini baada ya kuhitimu masomo yao.
“Usomi wetu watanzani hauwezi kutafsiriwa kwenye kutumika kwa watu ambao hawajui lugha ya kiswahili, mana hata tunapokwenda likizo kwa wazazi wetu lugha tunayotumia ni lugha yetu ya asili ili tuweze kuelewana ndicho tunachokitaka na huku,”amesisitiza Naibu Waziri Geophrey
Aidha, ametoa wito kwa washiriki kila mmoja kwa nafasi yake kutoa elimu juu ya masual hayo maana kutafsiri uendeshaji wa mashauri kwa lugha ya kiswahili katika uendeshaji wa mashauri ni jambo lingine na kujua watumiahi wanapokeaje na kwenda kuutumia lugha hiyo ambayo ni sehemu ya maboresho ni jambo lingine.
Akitoa mada Mkurugenzi Mtendaji Chama Cha Wanasheria Tanzania(TLS) Kaleb Gamaya, kuhusu msaada wa kisheria kwenye makosa ya jinai kwa amri ya mahakama, wigo, aifa za kupata huduma na upatikanaji wake.
Amesema kwenye mahakama pekee nchini watu wanaohitaji msaada wa kisheria ni wengi.
Gamanya amefafanua kuwa, kwenye mahakama kuu zamani hakukuwa na msaada wa kisheria ila msaada huo ulikuwa ukitolewa kwa watuhumiwa wenye makosa makubwa na ulikuwa ukitolewa kwenye makoa mengine ikiwemo mauaji na uhaini, wigo wa msaada wa kisheria ulikuwa mdogo kipindi hicho tofauti na hivi sasa.
Na Happiness Mtweve,Arusha
