NAIBU Waziri wa Ardhi, Nyumba na Maendeleo ya Makazi, Ridhiwani Kikwete ametembelea baadhi ya maeneo yaliyoathirika na mvua iliyoambatana na upepo katika jimbo la Chalinze mkoani Pwani na kutoa pole kwa wote walioathirika na mvua hizo.
Usiku wa kuamkia Januari 20, mvua kubwa ilinyesha iliyoambatana na upepo mkali katika maeneo mbalimbali ya mikoa ya Pwani na Dar es Salaam, ambapo katika jimbo la Chalinze mkoa Pwani nyumba 36 zikiwemo shule mbili za msingi za Makombe na Bwilingu ziliathiriwa na mvua hiyo.
Naibu Waziri wa Ardhi Ridhiwani Kikwete ambaye ni Mbunge wa Jimbo la Chalinze, alifanya ziara katika maeneo hayo na kuzitembelea familia zilizoathirika na mvua hizo ambapo paa zao ziliezuliwa, alisema serikali iko pamoja nao.
Akiwa katika kijiji cha Makombe kilichopo kata ya Lugoba, Chalinze mkoani Pwani, Ridhiwani alijionea athari iliyosababishwa na mvua hizo ambapo aliwafariji waathirika na kuwaeleza kuwa, akiwa kama mbunge atashirikiana na halmashauri ya Chalinze kuangalia namna ya kuwasadia wale walioathirika ili waweze kurudi katika maisha yao ya kawaida.
“Binafsi yangu nieleze nimesikitishwa na janga lililotokea lakini wakati mwingine tuamini kila jambo linapangwa na Mwenyezi Mungu na lina sababu zake nyingi” alisema Ridhiwani.
Akielezea uharibifu uliotokea katika shule ya Msingi Makombe, Ridhiwani ameagiza kufanyika jitihada za haraka ili kuyarejesha madarasa yaliyoathirika kurudi katika hali yake ya kawaida ili wanafunzi waweze kuyatumia kwa kuwa tayari shule zimefunguliwa.
“Binafsi namshukuru MwenyeziMungu kwa sababu katika taarifa yenu hatukupata taarifa ya mtu aliyeumizwa kwa sababu wakati mwingine inapotokea wanafunzi wako darasani inakuwa ni hatari sana ” alisema Ridhiwani.
Katika kinachoonekana kuunga mkono hatua zinazofanyika kutokana na kadhia iliyotokea kwa madarasa ya shule,Naibu Waziri huyo alitoa sh. milioni 5 ili kusaidia kurekebisha sehemu zilizopata athari ya mvua ili wanafunzi waweze kuendelea na masomo.
Kwa upande wake, Mkurugenzi wa Halmashauri ya Chalinze, Ramadhani Possi alimueleza Naibu Waziri Ridhiwani kuwa, mvua iliyonyesha mbali na kuezua mapaa ya nyumba 36, mvua hiyo pia ilileta athari kwa shule mbili za msingi za Makombe na Bwilingu A.
Hata hivyo, alisema baada ya kutokea kwa tukio hilo, ofisi yake ilianza kuchukua hatua mbalimbali ikiwemo kufanya tathmini ya uharibifu uliotolea shule ya msingi Makombe na kuahidi ndani ya wiki moja madarasa kuanza kutumika.
“Kule katika kijiji cha Makombe tatizo ni kubwa zaidi ambapo hatua tumeanza kuchukua kama halmashauri na leo mbunge ametuongezea nguvu, katika gharama ya milioni 26 anatuongezea milioni 5 na fedha ikiingia itasaidia zaidi” alisema Possi.
Kwa upande wake, Diwani wa Bwilingu, Nasser Karama alisema mvua iliyonesha imeleta athari kwa baadhi ya wananchi wa kitongoji cha Bwilingu pamoja na shule ya msingi Bwilingu ‘A’ ambapo baadhi ya wananchi wamepata hifadhi na kusaidiwa vyakula na wadau mbalimbali.
Hata hivyo, alikishukuru Chama Cha Mapinduzi(CCM) pamoja na Mbunge wa jimbo la Chalinze kwa kuchukua hatua za haraka mara baada ya kupata taarifa ya kutokea kwa maafa hayo ambapo alisema hatua hiyo imewafariji sana.
“Mie katika kata yangu nimeathirika hili darasa moja na nyumba ya mwalimu pamoja na madarasa yaliyochakaa ila tumepata tumaini baada ya kutembelewa na mbunge na mkurugenzi wa halmashauri ya Chalinze” alisema Karama.
Na Mwandishi Wetu, CHALINZE
